दुई नम्बर प्रदेशका हार व्यहोरेपछि ओलीको यस्तो अभिव्यक्ति !

By | September 22, 2017

काठमाडौं। नेकपा एमालेका अध्यक्ष केपी शर्मा ओलीले प्रदेश नम्बर २ को स्थानीय तह निर्वाचनको परिणामबाट बिचलित नहुन पार्टीका नेता कार्यकर्तालाई आह्वान गरेका छन्।

अध्यक्ष ओलीले कुनै ठाउँ विशेषको निर्वाचन परिणामको विषयलाई लिएर पार्टी भित्र दोषारोपणको राजनीति सुरु गर्न नहुनेतर्फ सबैलाई सचेत गराए।

शुक्रबारबाट सुरु भएको पार्टी केन्द्रिय कमिटीको ८ औं बैठकलाई सम्बोधन गर्दै अध्यक्ष ओलीले एक्लै भिड्न नसक्ने भएपछि प्रदेश नम्बर २ को स्थानीय तह निर्वाचनमा अन्य सबै दलहरुले आफ्नो पार्टी विरुद्ध मोर्चाबन्दी गरेका कारण केही कमजोर देखिएको दाबी गरे।

अध्यक्ष ओलीका विगतका अभिव्यक्तिले पनि प्रदेश नम्बर २ को स्थानीय तह निर्वाचन परिणाम काँग्रेसको भन्दा कमजोर भएको पार्टी भित्रै चर्चा सुरु भइरहेका छन्।

सोही प्रसंग उल्लेख गर्दै अध्यक्ष ओलीले चुनावी परिणामलाई लिएर पार्टी भित्र दोषारोपण नगर्न पार्टीका सबै नेता कार्यकर्तालाई सचेत गराएका हुन्। उनले प्रदेश नम्बर २ को कतिपय स्थानीय तहमा अन्य दलहरुले धाँधली गरेका कारण पनि पार्टीले हार व्यहोर्नु परेको जिकिर गरे। अध्यक्ष ओलीले प्रदेश सभा र प्रतिनिधि सभा निर्वाचन पछि एमालेले बहुमतका साथ सरकार बनाउने दावी गरे।